Акафист святому страстотерпцу царю Николаю

Акафист святому страстотерпцу царю Николаю.

Кондак 1

 Избранный от рождения страстотерпче и Христовой любве воплощение, воспеваем ти похвальная, яко паче всего Отечество свое возлюбившему, ты же, яко имеяй дерзновение ко Господу, просвети омраченныя умы и сердца наша, да зовем ти:
Радуйся, Николае, Боговенчанный Царю и великий страстотерпче!

Икос 1

 Ангелов Творец посла тя земле Российстей яко Ангела незлобива на вразумление людей твоих, тя бо избра по образу Сына Своего Единороднаго в жертву искупления за грехи людей Российских, мы же, дивящеся таковому о тебе промышлению Вседержителя, со умилением вопием ти:
Радуйся, Христу уподобление;
радуйся, жертво всесожжения.
Радуйся, российских Царей украшение;
радуйся, страны своея утверждение.
Радуйся, незлобия и всепрощения образе;
радуйся, твердаго исповедания крепосте.
Радуйся, обидимых неложное упование;
радуйся, верных нерушимое основание.
Радуйся, Николае, Боговенчанный Царю и великий страстотерпче!

Кондак 2

 Видящи Всеблагая Богомати во Уделе Своем страну нашу мерзостию растления оскверняемую, избра тя от рождения, яко чистейшаго, Руси бо во очищение, да вси с несумненною надеждою тебе творим песнь:
Аллилуиа.

Икос 2

 Разум предвечный предустави тя ко спасению в житии твоем Иову Многострадальному подобно рождение твое и память праведника сочетавая. Мы же, во страдании за грехи наша, паче же за отступление от тебе Помазанника Божия, с трепетом смиренным и сокрушением сердечным вопием ти сице:
Радуйся, хулы и напасти от народа твоего претерпевый;
радуйся, сострадание к нему до конца имевый.
Радуйся, правило веры православныя;
радуйся, образе кротости Давидовы.
Радуйся светильниче правды;
радуйся хранителю истины.
Радуйся, смиренномудрия учителю;
радуйся, терпения Иовлева любителю.
Радуйся, Николае, Боговенчанный Царю и великий страстотерпче!

Кондак 3

 Сила Вышняго осени тя, Помазанниче Божий, лжемудрствующу западу вразумление противоратное соделавшаго, да мир весь Богу возопиет:
Аллилуиа.

Икос 3

 Имея тщание о благочестии, ревновал еси, благоверный Царю, храмов созиданию, мощей святых угодников Божиих прославлению, просвещения христианскаго насаждению и обездоленных от насилия ограждению, сего ради мир православный славит тя сице:
Радуйся, святителя Николая соимените;
радуйся, преподобнаго Серафима сомолитвенниче.
Радуйся, Православия насадителю;
радуйся, света Христова носителю.
Радуйся, царствования христианскаго учителю;
радуйся, православным странам охранителю.
Радуйся, обителей монашествующих покровителю;
радуйся, иконопочитания попечителю.
Радуйся, Николае, Боговенчанный Царю и великий страстотерпче!

Кондак 4

 Бури дерзости, злоречия и безумия не убоялся еси, страстотерпче Николае, глаго ля: измена, трусость и обман окрест всюду. Злохуления, заточение и умерщвление кротко претерпел еси, Богу Вседержителю вопия:
Аллилуиа.

Икос 4

 Слышаще державы Российския нестроение и видяще христиан поношение, непрестанно молился еси, да спасет Царица Преблагая Русь православную, сего ради похвальными песньми воспеваем ти таковая:
Радуйся, Пречистыя державный чтителю;
радуйся, чести икон Ея ревнителю.
Радуйся, в молениих за люди своя предстателю;
радуйся, их под державный покров Ея вручителю.
Радуйся, Христа ради чашу страданий испивый;
радуйся, изменников до конца простивый.
Радуйся, молитвы кадило благовонное;
радуйся, лампадо веры неугасимая.
Радуйся, Николае, Боговенчанный Царю
и великий страстотерпче!

Кондак 5

 Боготечная звездо россияном верным в разсеянии сущим явился еси, о имени твоем во едино их собирая и путь покаяния к Руси возрождению показуя, да возрадуются Ангелы о грешницех кающихся, взывающе:
Аллилуиа.

Икос 5

 Видя яко кротость и смирение твое во обращение не успевает, все упование на Мати Божию возложил еси и в руце Вседержителя всего себе предал еси, да и безумныя вразумит во еже пети тебе:
Радуйся, буйствующия гордыни победителю;
радуйся, венца смиренный носителю.
Радуйся, немощных стено необоримая;
радуйся, к людем своим любовь преизобильная.
Радуйся, чудесами в России Богом превознесенный;
радуйся, в разсеянии сущими прославленный.
Радуйся, за Россию жертво усердная;
радуйся, славяном, сердце милосердное.
Радуйся, Николае, Боговенчанный Царю и великий страстотерпче!

Кондак 6

 Проповедуют концы вселенныя славу твою, во всю землю изыде вещание твое, нестъ тоя жертвы, юже не принесл бых за благо Отечества своего, научая тем люди твоя покаянно пети Богу:
Аллилуиа.

Икос 6

 Возсиял еси паче солнца земли Российстей, святе Николае, предстательство людем твоим даже на Голгофе твоей явивый, да вси ко Христу обратятся и благодарственно воспоют:
Радуйся, свете от востока изшедый;
радуйся, тьмою запада не ослепленный.
Радуйся, сияние правды неистощимое;
радуйся, светило кротости незаходимое.
Радуйся, грешников вразумление;
радуйся, праведников прославление.
Радуйся, слуго Божий самодержавный;
радуйся, воистинну святый Царю православный.
Радуйся, Николае, Боговенчанный Царю и великий страстотерпче!

Кондак 7

 Хотяй веру православную на земли утвердити, подвигнул царство твое на заступление обидимыя страны Сербския, да видя добрая дела твоя, прославят Отца Небеснаго вопиюще:
Аллилуиа.

Икос 7

 Новаго тя Ноя, строителя спасения народа Российскаго и сохранителя страны Сербския, яви тя Господь, о Николае, православным людем победы подателю, да вси подвиги твоя поминающе, присно вси купно воспеваем ти:
Радуйся,Священного Писания исполнителю;
радуйся, предания Святых Отец хранителю.
Радуйся, дом души своея на камени Христе создавый;
радуйся Дом Матере Божия любовию утвердивый.
Радуйся, российскаго корабля ко спасению водителю;
радуйся, славян в бедах надежный утешителю.
Радуйся, христианских добродетелей носителю;
радуйся, греховных страстей искоренителю.
Радуйся, Николае, Боговенчанный Царю и великий страстотерпче!

Кондак 8

 Странное чудо видим на тебе, рабе Божий благий и верный, десницею Вышняго многажды охраняем с Царицею же и чады и слуги твоими мученическим венцем венчаемем, сего ради вниде в радость Господа твоего, мы же Промыслителю всяческих вопием:
Аллилуиа.

Икос 8

 Вси поем подвиг ваш крепкий, почитаем страдание, хвалим долготерпение, ублажаем кончину вашу. Воистину, что добро или что красно, но еже жити паче умрети, вкупе во Христе Иисусе за люди своя; мы же недостойная чада ваша, едиными усты и единым сердцем славим и воспеваем имена ваша сице:
Радуйся, Царице Александро Новая;
радуйся, Алексие, наследниче небесный.
Радуйся, Ольго Новая, богомудрая;
радуйся, Татиано милосердная.
Радуйся, Марие, целомудренная;
радуйся, Анастасие, агнице святая.
Радуйся, радужная седмерице, Завете Новаго Царствия;
радуйся цветниче благоуханный, торжество православия.
Радуйся, Николае, Боговенчанный Царю и великий страстотерпче!

Кондак 9

 Всякими чудесы являше Господь благоволение Свое российским людем, дондеже преогорчиша Его до зела, но тобою великомучениче Царю, к покаянию призываеми, надежду прощения имамы, да вопием Богу:
Аллилуиа.

Икос 9

 Ветии многовещаннии, яко рыбы безгласныя, не возмогут возрещи высоту твоего терпения, мы же глубину падения нашего созерцающе, в сокрушении духа восклицаем:
Радуйся, мужество необоримое;
радуйся, верносте христиан непоколебимая.
Радуйся, кающихся совершенное прощение;
радуйся, упорствующих долготерпение.
Радуйся, завет царствующего отца соблюдавый;
радуйся, пред Царем царей обет сохранивый.
Радуйся, Богу послушливый вельми;
радуйся, нелицемерный в любви.
Радуйся, Николае, Боговенчанный Царю и великий страстотерпче!

Кондак 10

 Спастися хотяй всем человеком и в разум истины приити, иже на крови мучеников Церковь Свою основавый Христос, положи тя, Царю самодержавный, во основание новыя храмины державы Российския, да сущии в ней верно вопиют Богу:
Аллилуиа.

Икос 10

 Стена еси всем к тебе с верою прибегающим и необоримое ограждение еси миру православному, отче чадолюбивый, научай вся верныя на помощь тя призывати сице:
Радуйся, благодатию немощных врачевание;
радуйся, оскудевающих добродетельми восполнение.
Радуйся, пленных свободителю;
радуйся, нищих защитителю.
Радуйся, буйствующих трезвление;
радуйся, от недугов страждущих исцеление.
Радуйся, новое Солнце Красное;
радуйся, очистительная реко багряная.
Радуйся, Николае, Боговенчанный Царю и великий страстотерпче!

Кондак 11

 Пение Пресвятей Троице даже до смерти принося, течение скончал еси и веру соблюл еси, еюже вся православныя христианы подвизаеши пети:
Аллилуиа.

Икос 11

 Светодателем послан быв земли нашей, яко агнец непорочный, полагаешися в жертву за грехи наша, да в покаянии узрим свет и вопием ти сице:
Радуйся, образ жития и кончины святыя давый;
радуйся, за грехи земли своея пострадавый.
Радуйся, за врагов своих моливый;
радуйся, мучителей своих простивый.
Радуйся, в житии твоем миротворче;
радуйся, на небесах христианом помощниче.
Радуйся, скипетром духовно управивый;
радуйся, порфирою духа украшенный.
Радуйся, Николае, Боговенчанный Царю и великий страстотерпче!

Кондак 12

 Благодать от Бога дадеся тебе, Николае, молитися за ны, о прощении за отступление наше от тебе, Помазанника Божия, и от наследия Святых Отец, но с упованием крепким вопием:
Аллилуиа.

Икос 12

 Поюще страдания твоя, страстотерпче святый, покланяемся благодати Всесвятаго Духа, явльшейся на тебе, да вси согласно вопием:
Радуйся, помазанниче Божий, присный молитвенниче;
радуйся, возлюбленное чадо Христово кротчайшее.
Радуйся, Царице праведною и мученицею быти способивый;
радуйся, чада твоя и слуги ко Христу приведый.
Радуйся, люди твоя во истине просветивый;
радуйся, Отечества чести не посрамивый;
Радуйся, Духа Святаго верный стяжателю;
радуйся, великия веры до конца показателю.
Радуйся, Николае, Боговенчанный Царю и великий страстотерпче!

Кондак 13

 О священная главо, помазанниче Божий Царю Николае, призри на царство твое земное и на люди твоя, и умоли Вседержителя, да не внидет в суд с нами, но да подаст нам велие прощение, возстание от падения и царства православнаго воскресение, вопиющим непрестанно:
Аллилуиа.
(Этот кондак читается трижды, а затем икос 1-й и кондак 1-й)

Икос 1

 Ангелов Творец посла тя земле Российстей яко Ангела незлобива на вразумление людей твоих, тя бо избра по образу Сына Своего Единороднаго в жертву искупления за грехи людей Российских, мы же, дивящеся таковому о тебе промышлению Вседержителя, со умилением вопием ти:
Радуйся, Христу уподобление;
радуйся, жертво всесожжения.
Радуйся, российских Царей украшение;
радуйся, страны своея утверждение.
Радуйся, незлобия и всепрощения образе;
радуйся, твердаго исповедания крепосте.
Радуйся, обидимых неложное упование;
радуйся, верных нерушимое основание.
Радуйся, Николае, Боговенчанный Царю и великий страстотерпче!

Кондак 1

 Избранный от рождения страстотерпче и Христовой любве воплощение, воспеваем ти похвальная, яко паче всего Отечество свое возлюбившему, ты же, яко имеяй дерзновение ко Господу, просвети омраченныя умы и сердца наша, да зовем ти:
Радуйся, Николае, Боговенчанный Царю и великий страстотерпче!

Молитва святому царю мученику Николаю

 О святый страстотерпче Царю мучениче Николае, Помазаника Своего тя Господь избра, во еже милостивно и право судити людем твоим и Хранителем царства православнаго быти. Царское служение сие и о душах попечение со страхом Божиим совершал еси. Испытуя же тя, яко злато в горниле, скорби горькия Господь ти попусти, якоже Иову Многострадальному последи же престола царскаго лишение и мученическую смерть посла ти. Вся сия кротко претерпевый, яко истинный раб Христов, наслаждаешися ныне вьшния славы у престола всех Царя, купно со святыми мученики: святою царицею Александрою, святым отроком царевичем Алексием, царевнами Ольгою, Татианою, Мариею и Анастасиею и с верными слуги твоими, так же со святою мученицею великою княгинею Елисаветою и со всеми Царственными мученики и святою мученицею Варварою. Но яко имея дерзновение велие у Христа Царя, Егоже ради вси пострадаша, моли с ними, да отпустит Господь грех народа, не возбранившаго убиение твое, царя и Помазанника Божия, да избавит Господь страждущую страну Российскую от лютых безбожник, за грехи наша и отступление от Бога попущенных, и возставит престол православных царей, нам же подаст грехов прощение, и на всякую добродетель наставит нас, да стяжим смирение, кротость и любовь, яже сии мученицы явиша, да сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.

Тропарь, глас 5-й

 Царства земного лишение, / узы и страдания многоразличныя / кротко претерпел еси, / Свидетельствовав о Христе даже до смерти от богоборцев, / страстотерпче великий Боговенчанный царю Николае, / сего ради мученическим венцем на небесех, / венча тя с царицею и чады и слуги твоими Христос Бог, / Егоже моли помиловати страну Российскую / и спасти души наша.

Кондак, глас 3-й

 Мирликийскому предстателю, царю святе, подражатель показался еси, Христово бо Евангелие исполнив, положил еси душу твою за люди твоя и спасл еси повинныя паче же и неповинныя от смерти, сих ради мученическую кровию освятился еси, яко великомученик Церкве Христовы.

Величание

 Величаем тя, святый царю мучениче Николае, и чтим честная страдания твоя, яже во Христе за Россию претерпел еси.

Скачайте полный текст акафиста в формате PFD (138 кб)

Для просмотра файла используйте Acrobat Reader.
© Валерий Белошапка, староста храма.
© Николай Соловьёв, web-дизайн, верстка. 2002-2003.